Marmerkoek

Jy het nodig:

810ml koekmeel

500ml strooisuiker

’n groot knypie sout

250g botter

250ml water

2 groot eiers

125ml melk

20ml asyn

6ml koeksoda

5ml vanieljegeursel

100ml kakao

Só maak ’n mens:

1. Voorverhit die oond tot 180°C. Berei twee ronde (22cm in deursnee) of vierkantige (16cm) koekpanne of ’n groot lasagnebak voor. Smeer die bodem met botter en plaas dan ’n stuk bakpapier van dieselfde grootte as die pan daarin. Smeer dit ook met botter of bespuit met kleefwerende kossproei.

2. Meng die meel, strooisuiker en sout in ’n groot mengbak.

3. Smelt die botter in ’n groot mikrogolfbestande bak en voeg die water by. Voeg dit by die meelmengsel en meng goed. Klits dan die eiers by.

4. Meng die melk, asyn, koeksoda en vanieljegeursel in die mikrogolfbak waarin jy die botter gesmelt het (dit sal bruis, baie opwindend!) en voeg dit dan by die meelmengsel.

5. Verdeel die beslag in twee (gebruik weer die mikrogolfbak). Voeg die kakao by die een helfte en roer goed tot deeglik gemeng.

6. Giet die twee kleure beslag in afwisselende rye in die voorbereide panne. Gebruik nou ’n mes om ’n krulpatroon tussen die twee te maak.

7. Bak 30-40 minute lank in die voorverhitte oond. Druk ’n skerp mes in om te kyk of dit gaar is. Die mespunt moet skoon uitkom. Laat afkoel en sny in blokkies.

#marbled #cake #koek #randrekker