Meringue met pienk peperkorrels, moerbeie en witsjokolade

Dié nagereg is bedwelmend mooi, soos die lente self, en is my gunsteling uit Purple Citrus and Sweet Perfumevan Silwena Rowe (uitgegee deur Hutchinsons).

Wees op die uitkyk na pienk peper­korrels by spesialiswinkels en hopelik is daar ’n moerbeiboom in jou omgewing. Die moerbeie kan deur ander bessies vervang word.

Om die meringues te maak klits vier eierwitte totdat dit styf is. Klits 220g strooisuiker bietjie vir bietjie by en vou 1t mielieblom en

½t witasyn by.

Skep die mengsel in ses hopies op ’n bakplaat wat met kleefvrye bakpapier uitgevoer is.

Nou kom die interessante deel: Maal 1 eetlepel pienkpeperkorrels in ’n stamper en vysel fyn en sif dan ¾ daarvan oor die rou meringue-hopies.

Bak die meringues vir ’n uur teen 140°C tot ’n ligte strooikleur. Laat in die oond afkoel.

Smelt 100g witsjokolade in ’n bakkie oor ’n kastrol liggies kokende water.

Bedruip die ­meringues met strepe gesmelte sjokolade, sif die oorblywende fyngemaalde pienkpeperkorrels oor en besprinkel met fyngemaalde kardemom.

Rond dit af met moerbeie.

Sit dit dadelik voor.

#meringue #pinkpepper #mulberries #chocolate