Onderstebo pynappel-en-granaatkoek

Dié koek is perfek vir dié tyd van die jaar omdat dit warm uit die oond voorgesit word saam met heerlike, tuisgemaakte vla en dekadente chantillyroom. Jy kan die pynappel en granaatpitte deur ander vrugte vervang.

Jy het nodig:

Vir die pynappel-en-granaatkaramel:

65g botter

140g suiker

die saadjies van 1 vanieljepeul

½ pynappel, in dun skyfies gesny

100ml granaatpitte

Vir die sponskoek:

170g sagte botter

340g strooisuiker

3 eiers

200g meel

12ml bakpoeier

40ml melk

10ml vanieljegeursel

Vir die tuisgemaakte vla:

400ml melk

4 eiergele

80ml strooisuiker

Vir die chantillyroom:

300ml vars room

die saadjies van 1 vanieljepeul

100ml versiersuiker

Só maak ’n mens

1. Maak die karamel eerste: Smelt die botter in ’n kastrol en roer die suiker by. Laat dit liggies prut totdat ’n gladde karamel vorm (dit behoort binne 5 minute te gebeur).

2. Roer die vanieljesaadjies by, asook die dun pynappelskyfies en die granaatpitte, en laat nog ’n minuut borrel.

3. Skep hierdie mengsel in die bodem van ’n 25cm-losbodem-koekpan wat deeglik gesmeer en met bakpapier uitgevoer is.

4. Maak die sponskoekbeslag aan terwyl die karamel afkoel: Klop die botter en strooisuiker saam tot lig en donsig. Voeg die eiers een-een by en klits goed ná elke byvoeging.

5. Sif die meel en bakpoeier saam en voeg die helfte daarvan by die bottermengsel.

Klits die melk en vanieljegeursel by, gevolg deur die res van die meel.

6. Skep die beslag versigtig in die koekpan.

Bak 45 minute by 180°C. Laat effens in die pan afkoel en keer dan uit sodat die pynappel-en-granaatkaramel bo is. Sit warm saam met vla of chantillyroom voor.

7. Om die vla te maak: Verhit die melk (dit moenie kook nie) in ’n kastrol. Klits die suiker en eiergele saam in ’n mengbakkie. Giet ’n klein bietjie (sowat 80ml) van die warm melk by die eiermengsel en klits aanhoudend. Dié stap is nodig, want dit keer dat die vla skif. Voeg nou die eier-en-melkmengsel by die res van die melk in die kastrol.

Roer aanhoudend oor matige hitte totdat die vla dik en romerig is.

8. Om die chantillyroom te maak: Voeg die vanieljesaadjies by die room en klits dit tot die sagtepunt-stadium. Sif die versiersuiker oor die room en hou aan klits totdat die room heerlik dik is. Sit dadelik voor.

#pineapple #pomegranate #cake #koek