Ongewone warmsjokolade
- Leandri & Seline van der Wat
- May 22, 2015
- 2 min read
Genoeg vir 6.
Jy het nodig:
150ml room
200g donkersjokolade
90ml kondensmelk
360ml espresso
1 liter melk
’n knypie sout
Vir die malvalekkers:
500g strooisuiker
1e glukosestroop (beskikbaar by bakwinkels)
1½k koue water
25ml gelatienpoeier
70g eierwit (botteltjies met eierwit is beskikbaar by onder meer Woolworths)
1t fyngerasperde suurlemoenskil
1t fyngerasperde vars gemmerwortel
mielieblom
Só maak ’n mens
1. Maak eerste die malvalekkers deur 450ml van die strooisuiker, die glukosestroop en 185ml van die water in ’n kastrol te verhit tot 127°C (jy gaan ’n suikertermometer hiervoor nodig hê).
2. In ’n afsonderlike bakkie, sprinkel die gelatien oor 185ml koue water en laat 5 minute staan. Verhit dan die gelatien in die mikrogolf vir 45 sekondes totdat die gelatien gesmelt het (die mengsel moet deurskynend wees).
3. Klits die eierwit met ’n elektriese klitser tot skuimerig en voeg dan die res van die strooisuiker by en klits op hoog tot blink. Sodra dit sagte punte maak, voeg die warm gelatien stadig en in ’n dun straaltjie by terwyl jy aanhoudend klits.
4. Sodra die gelatien heeltemal bygeklits is, voeg die warm suikerstroop ook in ’n dun straaltjie by terwyl jy teen hoë spoed klits. Hou aan klits totdat die suikerstroop heeltemal vermeng is. Verlaag die spoed en klits op medium-hoog die suurlemoenskil en gemmer by. Klits totdat die mengsel kamertemperatuur bereik.
5. Giet die mengsel in gesmeerde panne en laat 3 uur staan totdat gestol. Sif mielieblom oor voordat jy die malvalekkers in vorms van jou keuse sny.
6. Om die sjokolade-ganache te maak, verhit die room in die mikrogolf totdat dit net begin stoom. Breek die donkersjokolade in klein stukkies en plaas dit in ’n mikrogolfbestande bak. Giet die warm room en die kondensmelk oor en plaas terug in die mikrogolf vir 30 sekondes. Laat ’n paar minute staan sodat die sjokolade kan smelt. Voeg die knippie sout by (dit versterk die smaak van
die sjokolade) en roer dan deeglik tot glad. Verdeel die ganache eweredig tussen koppies of latte-glase.
7. Laat die melk opkook in ’n kastrol en voeg die vanieljegeursel by. Verdeel die warm melk tussen die koppies of glase. Ons gooi die melk stadig in om te voorkom dat die ganache- en melklae meng voordat jy die drankie voorsit.
8. Gooi nou 60ml espresso (of sterk kitskoffie van goeie gehalte) by elke koppie. Giet die koffie stadig oor die agterkant van ’n eetlepel om te voorkom dat die lae meng.
9. Kap nou die malvalekkers in klein blokkies en sprinkel bo-oor die dekadente drankie. Gebruik ’n blaasvlam om die malvalekkers ’n bietjie kleur te gee. Sit die drankies warm voor met ’n teelepel vir elkeen om dit mee te roer en die malvalekkers af te skep, indien verkies.
Comments