Rice Krispies-hartjies

Gee hierdie klassieke lekkerny ’n Valentynsdag-kinkel deur dit in hartjie-vorms uit te druk en in pienk sjokolade te doop.

Jy het nodig:

3e botter

285g gewone malvalekkers of 4k mini-malvalekkers

6k Rice Krispies

200g witsjokolade

pienk voedselkleursel

versierseltjies van jou keuse

Só maak ’n mens:

1. Smelt die botter in ’n groot kastrol oor lae hitte.

2. Voeg die malvalekkers by en roer tot heeltemal gesmelt. Verwyder van die hitte.

3. Voeg die Rice Krispies by en roer goed totdat dit heeltemal met die malvalekkermengsel bedek is.

4. Skep uit in ’n pan van 33x23x5 wat deeglik met kleefwerende kossproei gespuit is. Gebruik waspapier om die mengsel plat te druk (dit is baie klewerig).

5. Sit dit so ’n halfuur in die yskas. 6. Gebruik dan ’n hartjievorm-koekiedrukker om hartjies uit die mengsel te druk.

7. Smelt die sjokolade in die mikrogolfoond en kleur pienk. Doop een helfte van die hartjie in die sjokolade en plaas op ’n bakplaat wat met waspapier uitgevoer is. Sprinkel van die versierseltjies oor voordat die sjokolade hard word.

Valentynswenk: Pak die hartjies in ’n mooi boksie en bederf jou geliefde daarmee. Bêre in die yskas.

#ricecrispies #chocolate #marshmallow