Rooibos-hoenderslaai

Genoeg vir 2.

Dié resep van die sjef Reuben Riffel is somerplesier op sy beste.

Jy het nodig

2 hoenderborsies, sonder vel of been

30 ml growwe seesout

1 blik (400 ml) klappermelk

375 ml sterk rooibos

30 ml strooisuiker

1 rooi brandrissie, ontpit

125 ml vars kruisementblare

1 knoffelhuisie, gekap

sap van 1 suurlemoen

125 ml kanola-olie

125 ml gemengde jong slaaiblare

125 ml uie- of boontjiespruite

3 kersietamaties, gehalveer

1 sprietui, gesny

1 avokadopeer

Só maak ’n mens

1. Vryf die hoenderborsies met die sout in en plaas 1 uur lank in die yskas.

2. Voorverhit die oond tot 150 °C.

3. Plaas die klappermelk, 250 ml van die rooibos en 15 ml van die strooisuiker in ’n plat oondpan.

Sit die hoenderborsies in die klappermelkmengsel.

4. Bak 20 minute lank of tot die hoender gaar is.

5. Verwyder uit die oond en laat dit afkoel. Haal die hoender uit die vloeistof en plaas in die yskas tot yskoud. (Gebruik die klappermelkmengsel om sop of ’n sous te maak of vir ’n vis- of noedelgereg.)

6. Meng die brandrissie, twee kruisementblare, knoffel en ’n bietjie sout in ’n vysel en maak dit fyn met ’n stamper. Voeg die suurlemoensap, die res van die rooibos, die res van die strooisuiker en die olie by en meng goed.

7. Sny die hoender in dun repies. Meng die hoenderrepies met die res van die kruisement, die slaaiblare, spruite, tamaties en sprietui. Sny die avokado in blokkies en plaas dit in hopies in die middel van twee borde. Voeg die slaaisous by die slaaimengsel en skep dit bo-op die avokado. Sprinkel ’n bietjie ekstra slaaisous oor.

Foto: Danie Nel Photography

Resep uit die kookboek 'n Tikkie Rooibos.

#rooibos #chicken #salad #slaai