Sjokolademousse-kaaskoek met ’n Oreo-basis
- Leandri & Seline van der Wat
- May 22, 2015
- 2 min read
Jy het nodig:
Vir die kaaskoek:
200g Oreo-koekies
50g botter, gesmelt
5ml koffiepoeier
5ml Milo
460g roomkaas
20ml mielieblom
145ml strooisuiker
2ml sout
die fyngerasperde skil van ’n halwe suurlemoen
5ml suurlemoensap
die saadjies van 2 vanieljepeule
4eiers
5ml vanieljegeursel
125ml suurroom
Vir die sjokolademousse:
200g donker- of melksjokolade
1 eiergeel
1 eierwit
200ml vars room
Só maak ’n mens:
1. Maak eerste die kaaskoekbasis deur die Oreo-koekies fyn te druk en dit te meng met die koffiepoeier en Milo.
2. Meng die botter bietjies-bietjies by. Die mengsel moet sy vorm behou as jy dit tussen jou vingers vasdruk.
3. Smeer ’n 20cm-losboompan met botter (of bespuit met kleefwerende kossproei) en voer die buitekantste, onderste helfte van die pan met foelie uit.
4. Druk die Oreo-mengsel deeglik op die bodem van die pan vas en sit dan in die yskas om te verkoel tot hard.
5. Begin solank met die vulsel van die kaaskoek deur die roomkaas en mielieblom saam te klits tot sag en donsig.
6. Voeg die sout en strooisuiker by en klits goed.
7. Skraap die saadjies uit die vanieljepeule en voeg dit by die roomkaasmengsel. Roer ook die suurlemoensap en -skil by.
8. Klits die eiers een vir een by en klits goed ná elke byvoeging.
9. Voeg die vanieljegeursel en suurroom by en klits goed.
10. Skep die vulsel in die voorbereide pan en sit dan die pan binne-in ’n groot, oondvaste bak.
11. Maak ’n bain marie (waterbak) deur die bak halfpad met kookwater te vul (die water moet sowat halfpad teen die kant van die pan met die kaaskoek wees).
12. Bak die kaaskoek 40 minute by 160°C. Haal dan uit die oond en laat in die waterbad afkoel. Haal dan uit en plaas in die yskas. Sodra dit heeltemal koud is, kan jy die sjokolademousse bo-op die kaaskoek spuit.
13. Om die sjokolademousse te maak, verhit 50ml van die room tot stomend. Breek die sjokolade in stukkies en plaas in ’n bakkie. Giet die warm room oor die sjokolade en roer tot gesmelt. Klits nou vinnig die eiergeel by.
14. Klits die res van die room styf en vou by die sjokolademengsel in.
15. Klits die eierwit styf en vou dit ook by die sjokolademengsel in.
Laat ten minste 30 minute in die yskas afkoel voordat jy dit in ’n versiersak skep en bo-op die kaaskoek spuit.
Σχόλια