Skelvis-sop

Die aartappelblokkies in dié heerlike, romerige sop sorg dat dit ’n vullende maaltyd is. My ma maak dit al jare lank en die resep kom uit ’n Soups and Stews-boek wat in die 1990’s by Woolworths te koop was. Die sop vries goed (laat net die room weg en roer dit by wanneer jy dit wil voorsit).

Genoeg vir 4-6.

Jy benodig:

500g bevrore skelvis­filette

1 groot aartappel, in klein blokkies gesny

1 selderystokkie, gekap

1 middelgroot ui, gekap

50g botter

1 repie swoerdlose spek, fyngekap

2e meel

½t mosterdpoeier

½t Worcestersous

1k melk

½k vars pietersielie, fyngekap

60ml room

Só maak ’n mens:

1. Plaas die bevrore skelvis in ’n groot kastrol en voeg genoeg water by om dit te bedek. Laat opkook, verlaag die hitte en prut vir sowat 8 minute of tot die vis gaar is. Dreineer, maar behou van die water waarin jy die vis gekook het. Vlok die vis met ’n vurk en hou eenkant tot benodig.

2. Plaas die aartappel, seldery en ui in ’n kastrol en giet genoeg van die water waarin die vis gekook is by om die groente te bedek. Laat opkook, plaas ’n deksel skuins op en prut tot die aartappels net-net gaar is (dit moenie pap kook nie).

3. Smelt die botter in ’n groot kastrol, voeg die spek by en braai tot gaar. Roer die meel, mosterdpoeier en Worcestersous by en roer tot glad.

4. Giet die melk geleidelik by en roer aanhoudend oor lae hitte tot glad. Verhoog die hitte effens en roerkook vir 5 minute tot dik.

5. Voeg die groente (en die vloeistof waarin jy dit gekook het) by en dan die pietersielie en die vis. Prut oor lae hitte vir 5 minute tot deurwarm. Roer die room by net voordat jy die sop wil voorsit.

Foto: Nelius Rademan

#potato #fish #bacon #soup #sop #cream