Tom yum goong - Pikante steurgarnaal sop

Die onderstaande is wat jy nodig het vir een porsie. Vermeerder soos nodig vir die hoeveelheid mense vir wie jy kosmaak.

Jy het nodig:

■ 3 steurgarnale, skoongemaak en kop en dop verwyder (hou die sterte aan)

■ 300g hoender- of groente-aftreksel

■ 100g sampioene, gekap

■ 100g sitroenkruid, liggies gekneus en in 2,5cm-stukkies gekap

■ 2e vissous

■ 2e lemmetjiesap

■ 3lemmetjieblare, gekap

■ 1-2 klein, heel brandrissies (bird’s eye chilli)

■ 5 koljanderblare

Opsioneel:

■ 1e rooirissiepasta

■ 100g ingedampte melk

Só maak ’n mens:

1. Plaas die aftreksel in ’n kastrol en voeg die sitroenkruid by. Kook ’n paar minute lank.

2. Skep die sitroenkruid met ’n gaatjieslepel uit die aftreksel en laat dit weer opkook. Voeg die sampioene by en kook ’n minuut of twee.

3. Voeg die steurgarnale by en laat opkook. Voeg dan die vissous en lemmetjieblare by. Laat ’n minuut kook en roer dan die lemmetjiesap en rissies by.

4. Sit die tom yum goong in sopbakke voor en garneer met koljanderblare. As alternatief kan ’n mens die rissiepasta meng met die ingedampte melk en dit byvoeg – dan het jy tom yum num khon gemaak.

– Resep verskaf deur die Thaise departement van internasionale handelsbevordering.

#tomyumgoong #thailand #prawn #soup #sop