Truffel-fudge
- Karla Janse van Vuuren
- May 22, 2015
- 1 min read
Niks sê “ek is lief vir jou” soos ’n tuisgemaakte sjokolade-lekkerny nie. Hierdie happies is ’n huwelik tussen fudge en sjokolade-truffels en dit is absoluut hemels.
Maak 25 blokkies (die resep kan ook suksesvol gehalveer word)
Jy het nodig:
450g sjokolade van jou keuse (ek het witsjokolade en donkersjokolade gebruik)
1 blik kondensmelk
3e room
2t vanieljegeursel
Só maak ’n mens:
1. Voer ’n 15x20cm-bak met bakpapier of foelie uit.
2. Smelt 120g van die sjokolade (ek het hier witsjokolade gebruik) en giet dit onder in die pan. Verkoel 10 minute of tot ferm.
3. Plaas die res van die sjokolade en die kondensmelk in ’n mikrogolf-bestande bak en mikrogolf op hoog (roer elke 30 sekondes) totdat die sjokolade byna gesmelt is. Roer dan totdat die res van die sjokolade smelt.
4. Voeg die room en vanieljegeursel by en meng goed. Giet die mengsel bo-oor die sjokolade in die bak.
5. Plaas vir ten minste 2 uur in die yskas om te stol. Sny dan in blokkies.
Valentynswenk: Vir ekstra spesiale bederf, vervang die vanieljegeursel met 4t likeur van jou keuse; peperment werk lekker en koffielikeur is ook ’n wenner.
Comments