Gerookte viskoekies

Die geheim van dié viskoekies is die kombinasie van patat en gerookte snoek, maar maak gerus jou eie kombinasie met enige gerookte vis en kapokaartappel. ’n Heerlike peuselhappie vir wanneer die hongerpyne pla.

Maak genoeg vir 4-6 mense.

.1 koppie patat, gaargemaak en fyngedruk

.2 koppies gerookte snoek (of engelvis), gevlok

.2e gekapte agurkies of kappertjiesaad

.gerasperde skil en sap van 1 lemmetjie

.1 eier, geklits

.1e korrelmosterd

.4e vars pietersielie of koljanderblare, fyngekap

.½ ui, fyngekap

.2 knoffelhuisies, fyngekap

sout en peper, na smaak

.5 snye witbrood, gekrummel

.olie of botter vir braai

1. Meng al die bestanddele (behalwe die krummels en olie) saam. Vir ’n fyner tekstuur, pols die mengsel in ’n voedselverwerker.

2. Meng die helfte van die broodkrummels deur die mengsel. Proe en voeg lemmetjiesap of sout by.

3. Vorm ongeveer agt ronde koekies met die hand en rol dit in die oorblywende krummels. Sit die koekies vir 30 minute in die yskas – dit sal keer dat die koekies maklik breek. Jy kan dit al die aand voor die tyd maak en in die yskas los of selfs vries.

4. Verhit olie of botter in ’n pan oor matige hitte (net genoeg om die bodem met ’n dun lagie te bedek) en braai die koekies vir ongeveer 5 minute aan elke kant. Draai die koekie om wanneer dit ferm en goudbruin van kleur is.

5. Sit die koekies voor met tuisgemaakte mayonnaise. Of kikker gekoopte mayonnaise op met ’n skeut paprika, suurlemoensap en growwe sout.

– Die resep kom uit Weg! ­Naweekkos deur Aletta Lintvelt. Dit word deur Human & Rousseau uitgegee en is teen R199,85 by boekwinkels beskikbaar.

Foto: Dirk Pieters en Lee Malan

#smoked #fishcakes #sweetpotato #snoek #gherkins #lime #mustard #garlic #bread