Meringue-burgers met haselneut en sjokolade

Die eeue oue pavlova raak weer ’n jong bokkie met hierdie haselneut-meringue-burger (of soet sliders). Die klassieke kombinasie van haselneute en sjokolade smaak weer nuut en die burger-voorkoms sit iets speels by die soet. Die haselneut-pralineroom klink dalk “sjefferig”, maar dis makliker as tameletjie-maak.

Bedien 4 baie ruim porsies (3 sirkels per porsie) of bedien 6 met 2 sirkels per porsie.

Jy het nodig vir die meringues:

.4 groot eierwitte

.5ml suurlemoensap

.100g goue strooisuiker (verpoeier gewone geelsuiker in ’n versapper/voedselverwerker)

.100g versiersuiker

. 50g haselneute, fyngemaak in voedselverwerker

. 10ml kakaopoeier

Vir die haselneut-pralineroom:

. 100g wit strooisuiker

. 100g haselneute (heel)

. 150ml klitsroom

Vir die sjokoladesous:

. 50g geel strooisuiker (maak geelsuiker fyn in voedselverwerker)

. 50g kakaopoeier

. 50g donkersjokolade, fyngekap

So maak mens:

1. Verhit oond tot 120°C.

2. Voer bakplaat uit met bakpapier.

Merk 7cm-sirkels af op die papier sodat die meringue-“burgerrolletjies” ewe groot is (3 meringue-sirkels per porsie).

3. Maak die meringue: Klits eierwitte en suurlemoensap saam tot sagte punte. Vou strooisuiker ’n paar skeppe op ’n slag by en klits tussen elke byvoeging. Meng versiersuiker en kakao met die fyngemaakte neute by en vou by die eierwit tot goed gemeng. Spuit of skep die meringue in die sirkels. Bak 1½ tot 2 uur tot bros buite, maar sag binne. Laat afkoel.

Wenk: Die meringues kan vooraf gemaak word. Dit hou ’n week in ’n lugdigte houer.

4. Maak die haselneut-praline:

Plaas ’n vel bakpapier op ’n bakplaat (die praline gaan daarop uitgegooi word om af te koel).

Verhit ’n kleinerige swaarboompan oor matige hitte en kook die goue strooisuiker tot gesmelt. Kantel (swirl) die pan sodat dit eweredig karameliseer. Gooi heel haselneute by en kantel in die karamel vir 1-2 min.

Gooi die mengsel uit op die bakplaat en laat afkoel. Kap fyn met ’n mes of in ’n voedselverwerker. Hou eenkant.

5. Maak die sjokoladesous: Verhit 150ml water, strooisuiker en kakaopoeier totdat dit begin kook. Haal van die plaat en giet dit in ’n ander bakkie oor die opgekapte sjokolade en meng tot glad.

6. Bediening: Klits room totdat sagte punte vorm. Hou ’n bietjie van die praline eenkant en vou die res by die room. Maak meringue-stapels met sjokolade en pralineroom tussen elke laag. Strooi praline bo-op.

#meringue #hazelnut #chocolate