Pynappel-en-klapperplaatkoekies

Doen ’n slag ’n voorraadopname van die spenskas.

In alle waarskynlikheid het jy reeds die bestanddele vir hierdie resep in die kas. Vinnige meelmengsels soos vir plaatkoekies, pannekoeke en vetkoek is ’n goeie manier om blikkieskos en ander ingelegde produkte, wat al lank op die rak staan, vindingryk te gebruik.

Dis ook die redding van huiskokke wat in ’n kits ’n horde kinders en hul maats se hongerpyn moet stil.

Hier word ’n blikkie fyn pynappel, klapper en goue stroop (wat gewoonlik op die spensrak is) die hoekstene vir ’n heerlike bederf aan die ontbyttafel, as tussen-maaltyd-versnapering of selfs as nagereg.

Pak ’n stapeltjie van vier plaatkoekies op elkeen se bord.

2 groot eiers, geklits

150 ml melk

’n knippie sout

140 ml (75 g) koekmeel

125 ml klapper

1 blikkie (200 g) fyn pynappel

goue stroop vir bediening

1. Klits die eiers, melk en sout saam en klits meel by totdat dit klontvry is. Voeg die klapper en pynappel by die beslag.

2. Verhit ’n pannetjie en smeer liggies met olie. Bak plaatkoekies tot goudbruin en gaar.

Om te bedien stapel vier plaatkoekies op ’n bord per persoon, bedruip ruimhartig met goue stroop en bedien met ’n skeppie crème fraîche.

Foto: Samarie Smith

#pineapple #coconut #pancakes