Suurlemoen-jogurtkoek

Dié maklike resep is altyd ’n sukses.

Die koek rys hoog, het ’n wonderlike tekstuur en is heerlik net so, selfs net met ’n bietjie versiersuiker oorgesif. Maar hy leen hom ook uitstekend tot ’n deftige partytjiekoek – in dun lagies gesny met vulsels soos suurlemoensmeer, Italiaanse meringue of geklopte wit ganache tussen-in.

■ 3 ekstragroot eiers

■ 60 ml olie

■ Fyngerasperde skil en sap van 1 groot suurlemoen

■ 10 ml vanieljegeursel

■ 250 ml strooisuiker

■ 375 ml bruismeel

■ 250 ml dik volroomjogurt

Versiersel

■ 375 ml versiersuiker

■ Skeut vars suurlemoensap

■ Fyngerasperde suurlemoenskil of gekarameliseerde suurlemoenskyfies, om mee af te rond

Voorverhit die oond tot 180°C en smeer ’n losboomkoekpan van 22 cm goed met botter. Klits die eiers, olie, suurlemoenskil, vanieljegeursel en strooisuiker baie goed saam. Vou die meel by die eiermengsel in en voeg die jogurt en suurlemoensap by. Vou dit ook in, tot die mengsel glad is. Skep in die voorbereide pan en bak vir 1 uur of tot ’n toetspen skoon uit die middel van die koek kom. Laat vir 5-10 minute in die pan afkoel voordat jy die koek op ’n draadrak uitkeer om verder af te koel.

Sodra die koek afgekoel is, meng die versiersuiker met bietjie vir bietjie suurlemoensap tot ’n dik, gladde, smeerbare versiersel. Smeer bo-op die koek en laat dit effens teen die kante afloop. Rond af met ekstra fyngerasperde suurlemoenskil of skyfies gekarameliseerde suurlemoen. Bêre in ’n lugdigte houer en eet binne 4 dae op. Lewer 14-16 porsies.

#lemon #yogurt #cake #koek