SKAAPSTERTJIES – blinkbruin

Ek weet skaapstertjies skop jy nie sommer agter elke bos uit nie, maar deesdae kry ek dit redelik maklik by Checkers hier op ons dorp. Anders vra jou slagter om dit vir jou bymekaar te maak. Dis n heerlikheid wat kan werk as n hoofgereg of sommer as iets om aan te peusel voor die grootkos kom. Deesdae is hierdie afskeepkos n gesogte lekkerny. Ek het myne in die oond gaargemaak, maar dit kan ook op die rooster gebraai word.

BENODIG:

30 skaapstertjies

3 heel naeltjies

sout, peper en koljander na smaak

250 ml tamatiesous

100 ml chutney

100 ml worcestersous

250 ml witwyn

1 ui in ringetjies

NOU:

Sny die ui in ringetjies in n oondvastebak.

Pak die skaapstertjies daarop en geur met sout, peper en koljander.

Gooi jou 3 heel naeltjies in.

Meng die res van die bestandele.

Gooi oor die vleis.

Braai toe by 180 grade celsius vir 45 min.

Maak dan oop en braai vir nog 90 minute oop.

Draai die stertjies tyd tot tyd om.

Hierdie groot bederf is vinger-aflek-lekker.

#lamb #tail #erf #braai