Kerrie en Piesang Frikkadelle
- Maklike Resepte
- Jul 3, 2015
- 2 min read
'n Smaaklike Kerrie en Piesang Frikkadelle resep, lekker boerekos (6 porsies)
Bestanddele
Frikkadelle
- 2 dik snye witbrood
- 125 ml karringmelk
- 1 kg maer maalvleis
- 1 ui, gerasper
- 1 eier
- 12,5 ml blatjang
- 2 ml kerriepoeier
- 2 ml neutmuskaat
- 2 ml naeltjies
- Sout en peper
- Koekmeelblom
Sous
- 25 ml margarine
- 4 groot uie, gekap
- 25 ml koekmeelblom
- 125 ml asyn
- 15 ml suurlemoensap
- 750 ml water
- 12,5 ml kerriepoeier
- 5 ml borrie
- 37,5 ml appelkooskonfyt
- 12,5 ml blatjang
- 10 ml suiker
- 6 ryp piesangs
Metode
Stoofplaat en oond
Die frikkadelle:
Week die brood in karringmelk en meng dit in met die res van die frikkadelbestandele, alles behalwe die koekmeelblom.
Vorm die frikkadelle, en rol dit in die koekmeelblom en pak dit los in ‘n oondskottel met ‘n deksel.
Voorverhit die oond tot 190° C ( 375° F )
Die sous:
Verhit die margarine in ‘n kastrol, voeg uie by en braai tot dat sag.
Voeg al die ander bestanddele by, behalwe die piesangs en roer.
Sny nou twee van die piesangs in skywe en roer dit by die sous.
Laat die sous prut vir ‘n paar minute tot die piesangs sag is.
Sny die ander 4 piesangs in skywe en strooi oor die frikkadelle in die oondskottel.
Gooi die sous bo-oor, plaas deksel op oondskottel en bak vir 1,5 – 2 uur of tot gaar.
Sit voor saam met rys, klapper en mengelslaai.
Mikrogolf
Maak die frikkadelle: net soos vir die oond, maar voeg 5ml paprika by die koekmeelblom waarin die frikkadelle gerol word. Mikrogolf die frikkadelle 10 minute onbedek op 100% krag.
Herrangskik die frikkadelle na 6 minute.
Die buitenste frikkadelle moet nou in die middel wees, en andersom.
Vir die sous, plaas die margarien en uie in ‘n glasbak en mikrogolf 5 minute onbedek op 100% krag. Voeg die res van die sousbestanddele in, behalwe die piesangs, en roer.
Sny 2 van die piesangs in skyfwe en meng by die sous en mikrogolf vir 7 minute op 100% krag. Roere so elke 2 minute.
Sny die ander 4 piesang in skywe en versprei oor die frikkadelle.
Gooi die sous oor, bedek en mikrogolf vir 10 minute op 50% krag en daarna 5 minute onbedek op 100% krag.
Comments