GEVLEGDE HOENDER PASTEI

Hierdie pastei is perfek om ontslae te raak van oorskietkos soos hoender, maalvleis en groente en die manier waarop die deeg gevleg word, is baie indrukwekkend.

(Bedien 4)

1 groot hoender*

botter

2 prei, gekap

2 knoffelhuisies, gekap

120 g sampioene, gekap

200 g laevetroomkaas

gerasperde skil van 1 suurlemoen

3 e pietersielie, gekap

400g skilferkorsdeeg

1 eier, geklits

sout en peper

Verwyder die hoendervleis van die bene af. Smelt botter in ʼn pan en braai preie tot sag. Voeg die knoffel by en kook nog 2 minute. Voeg sampioene by en kook 5 minute.

Die mengsel moet nie te nat wees nie. Laat afkoel en voeg die roomkaas, skil en pietersielie by. Rol die deeg uit en plaas op ʼn voorbereide bakplaat. Skep die vulsel in die middel van die deeg – los ʼn 10cm- rand.

Sny die rand se deeg in 2cm-stukkies en smeer die punte met die eier. Vou die deeg stukkies oor mekaar – amper soos ʼn vlegsel met net twee bene om die vulsel toe te maak. Smeer met die eier en bak 20 minute by 190˚C tot goudbruin.

*Indien jy nie oorskiethoender het nie, maar nog steeds ʼn kortpad soek – koop ʼn klaar geroosterde hoender.

Jy kan ook een kook: Sit ʼn gekapte wortel, ʼn paar takkies pietersielie en tiemie of roosmaryn, ʼn ui wat in kwarte gesny is en ʼn lourierblaar in ʼn pot met water. Plaas ʼn rou hoender in die water en kook sowat ʼn uur tot gaar. Dreineer die water en vries om later as tuisgemaakte hoenderaftreksel te gebruik.

#chicken #pie #puffpastry