Mieliepap met tamatie

Dié pap is eintlik ’n maaltyd op sy eie, maar jy kan dit ook met wors of ’n tjoppie voorsit.

Vir 4

Voorbereityd 10 minute

Gaarmaaktyd 30 minute

Jy benodig

3 heel groenmielies

2 eetlepels botter

8 ryp tamaties, gehalveer

1 koppie mieliepap of polenta

3 koppies water

1 ui, fyngekap

’n knippie paprika

’n knippie rooipeper

1 teelepel sout

1 koppie cheddar, gerasper

Só maak jy

Smeer die mielies met botter en braai hulle op die rooster totdat die pitte plek-plek verkleur.

Smeer die tamatiehelftes met olyfolie en plaas hulle vel-na-onder op die rooster. Braai dit sonder om die helftes om te draai totdat die velletjies begin verbruin en die vleis sag is.

Meng die pap of polenta goed met die water en bring dit dan stadig tot kookpunt terwyl jy aanhou roer. Sodra dit kookpunt bereik, voeg die ui, paprika, rooipeper en sout by. Verminder die hitte, maar hou aan roer terwyl die pap prut.

Sny intussen die mieliepitte van die stronke af en druk die tamaties met ’n vurk fyn. Meng die pitte en fyn tamatie met die pap en roer gereeld totdat die pap dik en sag is.

Roer die kaas deur en sit dit dadelik voor met gebraaide wors en ekstra kaas om bo-oor te sprinkel.

WENK Skep die pap voor dit heeltemal afkoel uit op ’n vel foelie. Rol die foelie langwerpig op om ’n dik rol te vorm. Sny die volgende oggend die afgekoelde rol pap in wiele en braai dié in botter bruin. Sit dit voor met gebraaide spek vir ontbyt.

#pap #tomato