Perfekte Sondagvarkboud

1 varkboud van ongeveer 5 kg

Fyn sout

Grof gemaalde sout

1 suurlemoen, middeldeur gesny

Begin die dag voor jy die varkboud wil voorsit. Maak vlak insnydings deur die vel en vet van die varkboud. Hoe nader aan mekaar die insnydings is, hoe makliker gaan die vel bros en krakerig bak, so probeer om die snye nie verder as 1 cm uitmekaar te maak nie.

Maak seker die vel is goed droog. Besprinkel die boud mildelik met fyn sout en vryf dit goed in die vel en in die insnydings. Sprinkel 'n bed grof gemaalde sout in 'n oondbak en sit die boud, met die gesnyde velkant na onder, op die sout neer. Sit dit oornag in die yskas.

Haal die boud die volgende dag uit die yskas en gooi die sout weg. Vee die boud goed af met 'n skoon lap en maak seker die vel is heeltemal droog. Vryf die hele vel goed met 'n halwe suurlemoen (of gebruik 'n asynlap) sodat die vel met 'n dun lagie suurlemoensap of asyn bedek is. Besprinkel weer met fyn sout en vryf dit goed in.

Voorverhit die oond tot 250 C. Sit die vark in die vuurwarm oond en oondrooster onbedek vir 40-60 minute of tot die vel bros en goudbruin is. Verlaag die hitte na 140 C en oondrooster die vark verder vir 3-4 uur tot die vleis baie sag is.

Sodra die vleis gaar is, skakel die oond se roosterelement aan en druk die boud onder 'n rooiwarm oondrooster tot die vel bros, goudbruin en krakerig is. (Wees versigtig om die vel nie teenaan die roosterelement te sit nie, anders sal dit brand.)

Laat rus die boud (maar moet dit nie bedek nie) vir 10 minute voor jy dit sny. Lewer 14 porsies.

#pork #lemon