✞ ✞ ✞ KYK NET OP ✞ ✞ ✞

. “Maar toe Petrus sien hoe sterk is die wind, het hy bang geword en begin sink…” Matteus 14: 30 . “Klim!” beveel die kaptein die jong matroos. Hy begin dapper teen die maspaal opklouter. Hoe hoër hy klim hoe lighoofdiger word hy. . “Ek gaan val!” skreeu hy terwyl hy op die wiegende dek afkyk. . “Kyk op na die vlag, Seun, kyk op na die vlag!” roep sy kaptein bemoedigend na hom. . Die jong matroos kyk dadelik op en hou sy oë op die vlag en klim veilig tot bo. . Ons is geneig om af te kyk na ons moeilikhede toe en dan faal ons geloof. . Dit is die fout wat Petrus gemaak het. Hy het wonderlik goed op die skuimende branders geloop, terwyl hy sy oë op Jesus gehou het. Hy maak die fout en neem sy oë weg van Jesus af en kyk na die wilde branders om hom. Hy luister na die loei¬ende wind en voel dit teen sy liggaam. Hy begin dadelik sink. . Dit verg nie veel bestudering van ons probleme om kleingeloof en vrees ’n vastrapplek te gee nie. Ons omstandighede inspireer nie geloof nie. . Geloof ontspring wanneer ons God se beloftes ter harte neem, Jesus in gedagte hou, sy krag, getrouheid, liefde en nabyheid betrag en doelbewus wegkyk, van die omstandighede of ervaringe af, wat ons ge¬loof ondermyn. Ongeloof maak ons moeilikhede onmoontlik groot. Naas God lyk ons probleme klein. Vrees vlug wanneer geloof opstaan. . Die ongelowige verspieders het in Kanaän reuse gesien. “Ons het daar ook die reuse gesien…ons was soos sprinkane in ons eie oë…” Num.13:33 . Vir Josua en Kaleb se geloofsoë het dieselfde reuse klein gelyk: . “Moet ook nie vir die mense van die land bang wees nie, want ons sal hulle maklik verslaan…Die Here is by ons. Moenie vir hulle bang wees nie” Num 34: 9 . .As jy wil vrees, kyk na jou moeilikhede. . As jy wil glo, kyk na God!

#pitkos #nicoliebenberg