✞ ✞ ✞ MA SE LAT BEREIK SY HART ✞ ✞ ✞

. “Dit was as gevolg van ons misdade en ons skuld dat hy deurboor en met geweld doodgemaak is … omdat Hy stukkend geslaan is, kan ons gesond word” Jesaja 53: 5

. Die Sjinese evangelis, Leland Wang, het deur sy ma se lat, die betekenis van Christus se dood aan die kruis vir ons leer ken. Toe hy ’n klein seuntjie was, was hy eendag uitermate stout en ongehoorsaam. Sy ma, lat in die hand, roep hom nader om sy straf vir sy stoutigheid te kry. Hy lag net vir haar en bly buite die bereik van haar grypende hand. Toe sy hom probeer vang, hardloop die ratse en lewendige seuntjie tergende vir haar weg. Sy gaan staan en sê hardop: “Ek gaan myself nou vir sy stoutigheid slaan.” Sy begin haar kaal arm hard met die lat slaan. Geskok gaan hy staan en hardloop terug na sy ma toe. Hy gooi homself in haar arms en pleit sy moet ophou om haarself te slaan. “Slaan my!” skreeu hy. “Slaan my! Ek was stout! Ek weet ek was stout!” . Sy skud haar kop terwyl hy en sy na haar arm kyk waar die riwwe van die harde houe lê. “Jou stoutigheid is klaar gestraf,” sê sy met trane in haar oë. Terwyl sy hom teen haar vasdruk, vervolg sy: “Ek sal mos nie jou óók nou slaan nie.” . In later jare toe hy die evangelie van die Here Jesus gehoor het, hierdie insident hom gehelp om Christus se straf, in ons plek, te verstaan. . Ons daaglikse lewe is vol voorbeelde van iemand wat self onskuldig is, maar ’n ander een se skuld en straf dra om die ander persoon vry te laat uitgaan. Die evangelie van die Here Jesus is ’n menslike verhaal wat uit ons daaglikse ervaringe verstaan kan word. . Christus het ook eenmaal vir die sondes gely om ons tot God te bring, Hy die Regverdige vir die onregverdiges…” 1 Pet.3: 18

#pitkos #nicoliebenberg