✞ ✞ ✞ DIE ONGELUKKIGE VERSUIM ✞ ✞ ✞

. “… dit… is nodig omdat julle weet hoe laat dit al is” Romeine 13: 11 . Na ’n treinongeluk in Engeland, het een van die slagoffers in sy sak, ’n assuransiekoepon van twee duisend pond (in 1983-ongeveer R3 500. Vandag ongeveer R 50 000 werd) gehad. ’n Groot hulp vir ’n gesin waarvan die broodwinner so skielik dood is. Maar hy het dit nie geteken nie. Dit was nie geldig nie. . Om die dokumentjie te teken sou die man net ’n sekonde of twee geneem het. Maar hy het dit nie geteken nie. . ’n Gedrang by die toonbank het hom moontlik verhinder om dit dadelik te teken. Maar hy het dit nie geteken nie. . Die aankoms van die trein het hom moontlik haastig gemaak en hy het besluit om dit op die trein te teken. Maar hy het dit nie geteken nie. . Drukte in die passasierswa het dit dalk vir hom moeilik gemaak. Dalk het hy nie dadelik ’n pen beskikbaar gehad nie. Talle goeie redes kon hom verhinder het om te teken – wat egter saak gemaak het, was, hy het dit nié geteken nie. Hy kon – maar hy hét nie. . ’n Betydse handeling kan ’n ongelukkige verloop van sake voorkom. Doen wat nodig is betyds. ’n Mens kan dit liewer te voortydig doen! Die bitterste verwyt bly egter die versuim om betyds, die saak van ’n mens se persoonlike saligheid af te handel. . In die lig van God se groot verlossingsaanbod, pleit Paulus, by die Korintiërs, om die saak van hulle redding nie te versuim nie: “Ons smeek julle namens Christus: Aanvaar die versoening met God wat Hy bewerk het. Christus was sonder sonde, maar God het Hom in ons plek as sondaar behandel sodat ons, deur ons eenheid met Hom deur God vrygespreek kan word….nou is dit die regte tyd, nou is dit die dag van redding” 2 Kor.5: 20 . Hierdie saak vra dadelike aandag of gaan daar oor jou gese word: Hy kon – maar hy hét nie . Die tyd was nog nooit so reg soos nou nie…..

#pitkos #nicoliebenberg