Appeltert in 'n potjie

Jy het nodig: Vir die vulsel: 8-10 Granny Smith-appels ½ k water ½ k rosyntjies 1 t kaneel 2 sopies brandewyn (of rum) Vir die krummelmengsel: 1½ k koekmeel 1½ k bruinsuiker 125 g gesoute botter nog 2 skeppies botter nog ’n bietjie kaneel vanieljeroomys (of room, om mee te bedien) Laat waai: 1. Skil die appels, sny in stukke van die stronke af en gooi in die potjie. Voeg die water, rosyntjies, kaneel en brandewyn by en meng deeglik. 2. Sit die deksel op die potjie en die potjie op die vuur. Kook die mengsel so 10 minute lank totdat die appelstukke sag word. Haal van die vuur af en hou eenkant. 3. Terwyl die appelstukke en hul vriende kook, gooi die meel, suiker en botter in ’n bak en vryf dit met jou vingerpunte totdat jy ’n droë, krummelrige mengsel het. 4. Gooi die helfte van die krummelmengsel by die gekookte appelvulsel in die potjie en meng deeglik. 5. Strooi die res van die krummelmengsel bo-op en versprei dit mooi eweredig. 6. Plaas ’n paar stukkies botter op die krummeldeeg en strooi ’n bietjie kaneel oor om die bolaag mooi kleur te gee. Sit die deksel op die potjie en vat hom vuur toe. 7. Sit die potjie op rustige kole en plaas ook ’n paar kole op die deksel. As die kole begin spoed verloor, krap nog kole onder die potjie in en pak nog ’n paar op die deksel. As die vuur groot is en die een kant van die potjie kry meer hitte as die ander, draai die potjie elke nou en dan. Bak vir so 45 minute tot ’n uur totdat jy die appelsous deur die kors sien borrel wanneer jy die deksel oplig. 8. Geniet dit saam met vanieljeroomys of room.

#apple #tart #tert #potjiekos #potjie