Tuisgemaakte klam jammerlappies - wet wipes

Nie net is dit heelwat goedkoper om jou eie jammerlappies te maak nie, maar dit is ook baie gesonder, want die wat ons in die winkels te koop kry is vol chemiese stowwe en kan so maklike uitslag veroorsaak op sensitiewe velletjies. As baba was my seuntjie baie sensitief vir die gekoopte produkte en ek was genoodsaak om 'n plan te maak. Na beraadslaging met Dr. Chris Pitzer, is my oorspronklike resep aangepas om dit nog beter te maak.

Jy benodig:

1 rol goeie kwaliteit handdoekpapier - sny met 'n skerp mes in die helfte

'n houer waarin die rol gemaklik sal pas met 'n deksel

2 eetlepels fyngerasperde seep. (Ek het boerseep gebruik, maar Dr. Chris beveel aan dat ons glycerine seep met 'n colloidal silver basis gebruik - beskikbaar by Askari)

1 liter sterk rooibostee

4 takkies roosmaryn (trek saam met die tee)

100ml colloidal silver

Metode:

Trek die rooibostee en roosmaryn saam tot dit 'n sterk tee is.

Meng die fyn gerasperde seep by en roer tot dit heeltemal opgelos is.

Voeg die colloidal by.

Plaas die halwe handoekpapier rol in die houer en verwyder die kartonnetjie in die middel.

Gooi die vloeistof oor die handoekpapier en maak seker dat dit goed absorbeer.

Plaas die deksel op en draai die houer om sodat die vloeistof deur die rol papier trek.

Indien verkies, maak 'n oorkruis keep in die deksel van die houer om die velletjies deur te trek.

Alternatiewe:

Gebruik dieselfde mengsel en gooi dit oor 'nappy liners' - gebruik wanneer doeke geruil word of in die motor.

Gebruik absorberende kombuisvadoekies om die wasbare 'wipes' te maak.

Gebruik 'n ou T-hemp in blokke gesny en omgekap om jammerlappies te maak.

Foto geleen

#wenke #tuisgemaak #medisinaal #chrispitzer #chrisgesond #corneliebenberg