Aspoester-pampoen
- Marianne Jacoby
- Apr 10, 2016
- 1 min read
Pampoen ■ 1 kleinerige heel pampoen, die kop afgesny en ontpit (behou die kop as deksel) ■ Sout en swartpeper na smaak
Vulsel ■ Olyfolie vir braai ■ 2 uie, rooi indien verkies, in stukkies gesny ■ 3 knoffelhuisies, fyngedruk ■ 1 groen soetrissie, in klein blokkies gesny ■ 5-7 ml elk fyn komyn, kaneel en koljander ■ 60 ml fyngekapte pietersielie ■ 30 ml fyngekapte kruisement ■ 60 g gekapte kasjoeneute of geroosterde amandels ■ 50 g geroosterde pampoensaad ■ ’n Groot hand vol sultanas of bosbessies ■ ’n Groot hand vol babaspinasieblare ■ 500-750 ml (2–3 k) gaar quinoa of koeskoes ■ Sap en skil van 1 lemoen ■ 50 g roomkaas
Voorverhit die oond tot 180°C.
Pampoen: Prik die skil van die pampoen goed, veral aan die onderkant, want dit trek baie water namate dit gaar word. Geur die binnekant goed met sout en peper.
Vulsel: Verhit die olyfolie en roerbraai die ui, knoffel en soetrissie tot sag. Voeg die speserye en kruie by en meng deur. Plaas die neute en sade saam met die sultanas of bosbessies en spinasie in ’n bak en meng goed.
Roer die quinoa of koeskoes by en geur met die lemoensap en -skil. Roer die roomkaas by. Skep in die pampoen, sit die deksel op en bak sowat 2 uur of tot die pampoen sag en gaar is. Sny in skywe en sit voor. Lewer 8 tot 12 porsies.
Commentaires