BRAAIVLEIS BREDIE

Omskep die naweek se oorskietbraaivleistjops in ’n vullende bredie en sit dit op ’n weekdag voor vir aandkos. Binne ’n halfuur kan julle aansit en eet. Dis genoeg vir 4-6 mense. Die bereiding is 10 minute en die gaarmaaktyd sowat 15 minute.

DIE BESTANDELE IS:

15 ml (1 e) olyfolie; 1 ui, grof gekap; 1 knoffel-huisie, gekneus; Flippen Lekka Spice na smaak; 6-8 heel gebraaide skaaptjops; 1 blik (410 g) heel tamaties; 1 blik (410 g) botterbone, gedreineer (Jy kan worteltjies en aartappels vooraf effe gekook ook gebruik) 250 ml (1 k) vleisaftreksel; 20 ml (4 t) blatjang; 250 ml (1 k) vars basilieblare; Gekapte pietersielie en ekstra basilieblare vir garnering.

Verhit die olyfolie in ’n groot pan en braai die ui en knoffel daarin tot sag en geurig. Geur met Flippen Lekka Spice. Voeg die skaaptjops, tamaties, botterbone, aftreksel, blatjang en basilieblare by en roer goed. Bring tot kookpunt, verlaag die hitte en laat sowat 10-15 minute oor lae hitte prut tot geurig en warm. Garneer met pietersielie en ekstra basilieblare. Sit voor saam met romerige fyn-aartappels en ’n vars groenslaai.

#braai #stew