Trompsburg Primêre Skool

Corne Liebenberg
May 11, 2016
2 min read

Trompsburg Primêre Skool is 'n skool met 'n eg plattelandse karakter waar kinders nog kinders kan wees en waar waardes en dissipline belangrik is.

Ons kinders kry die geleentheid om hul talente uit te leef en ook om die skool en koshuislewe te geniet. Elke jaar het ons kinders 'n wondelike jaar – kampe, konserte, geesbou, sport, kultuur, akademie, koshuislewe en die uitbou van vaardighede met Kuns en Kultuur, Tegnologie en in die Rekenaarsentrum.

Ons is nie skaam om te sê dat by Trompies gee ons baie aandag aan Christelike waardes en beginsels deur Bybelklasse en Saalopening. Verder glo ons aan streng dissipline en met ons klein klassies is 'n aangename klasatmosfeer vir ons belangrik. Tesame met bogenoemde glo ons ook daaraan om erkenning vir prestasies te gee.

Trompsburg Primêre Skool se visie is om 'n toonaangewende Christelike Afrikaanse skool te wees, waar elke leerder in totaliteit ontwikkel word.

Trompies se Gedragskode:

Ek verbind my plegtig tot die Grondwet van die Republiek van Suid-Afrika en ek onderneem om die reg en die regstelsel te respekteer, te onderhou en te bevorder.

Ek verbind my daartoe om: Hierdie gedragskode en al die reëls en regulasies van Trompsburg Primêre Skool getrou na te kom. Hoë morele en etiese standaarde te handhaaf. Daarna te streef dat my optrede altyd verantwoordelik en ter bevordering van die skool se goeie naam sal wees. My skoolwerk met ywer, pligsgetrouheid en toewyding te doen. Die nodige hoflikheid en respek teenoor alle personeel, mede-leerders en besoekers te betoon.