SKAAPBOUD

Scarborough Fair Ek hoop dit maak julle nuuskierig ...

Die titel verwys na die liedjie se tweede reel, naamlik "Parsley, Sage, Rosemary and Thyme" - die speserye wat ek gebruik. My skaapboud-resep is redelik maklik, en vat nie ure om voor te berei nie.

Ek begin gewoonlik 10:00 op 'n Sondagoggend, 11:00 is dit in die oond, 15:00 eet ons en vat dan 'n lekker middagslapie daarna.

1) 2 kg Skaapboud 2) 3 Groot aartappels 3) 2 Tamaties 4) 1 Groot ui 5) 1 Soetrissie 6) 4 Medium wortels 7) 1 Suurlemoen 8) Sout en Peper 9) 60 ml Olyfolie 10) Speserye : Pietersielie, Salie, Roosmaryn, Tiemie (Parsley, Sage, Rosemary, Thyme) vir die wat dink ek probeer slim klink

Metode: Skakel oond aan op 200 °C Meng al die speserye, sout en peper. As jy vars speserye gebruik, kerf dit eers baie fyn. Sny skaapboud in skywe (of gebruik boud-tjops), masseer speserymengsel goed in, steek sosatiestokkie deur om boud weer bymekaar te hou. Skil aartappels, sny in 1.5-2cm blokkies, versprei onder in "casserole" Sny tamaties, wortels, ui en soetrissie in skywe of repies (hoe jy dit verkies), meng dit en sit op aartappels. Plaas vleis bo-op, drup olyfolie oor vleis. Maak seker dat vleis oral olie het, gebruik meer as dit nodig is Sny suurlemoen in skywe, sit bo-op vleis. Sit deksel op casserole, sit in oond wat nou lekker warm behoort te wees, kyk gereeld (so halfuur - interval) of dit nog nie begin gaar word nie. Sodra die vleis begin ruik of dit gaar word, stel oond af na 170 °C toe. Hou gereeld dop. Die resep het nie water nodig nie, die sap van die vleis en groente is genoeg vog, en die eerste bietjie olyfolie keer dat alles vasbrand. Sodra vleis gaar is verwyder ek die suurlemoen heeltemal, dan haal ek gewoonlik die groente uit, gooi die sous in 'n pot en "braai" dan die vleis sonder die deksel vir so 10 minute om dit bietjie droër te maak. Die suurlemoensap maak die vleis HEERLIK sag!

Vat die sous, maak met Bisto / Gravo aan om 'n lekker dik bruin sous te hê. Dien op met bruinrys, soetwortels en murgpampoentjies. Totale tyd wat ek spandeer aan hierdie gereg is omtrent 2 ure, voorbereiding en "opcheck" ingesluit. Res van die tyd spandeer ek aan die Sondagkoerant

#legoflamb