LOOF DIE HERE, DIE GENADIGE EN BARMHARTIGE GOD!

Psalm 103 verse 1 & 2 Loof die Here o my siel, en alles wat binne-in my is, sy heilige Naam! Loof die Here o my siel, en vergeet nie een van sy weldade nie! My siel loof U my Here vir U goedertierenheid dat U aan ons onwaardige skepsels U Seun gestuur het om vir ons onmeetlike sondes gebore te word net om ons met U te versoen en daarmee ons sondes op sy skouers geneem het. Hoe groot is U ons God!

Geliefdes, op hierdie Nuwejaarsdag bring ek hiermee alle hulde aan ons Vader – nie alleen omdat Hy Sy geliefde Seun gestuur het nie, maar ook dat Hy ons so liefhet en ons iedere dag bystaan.

Weet julle, die liefde van Vader wat hy vir ons het is kosbaarder as korale en ons moet hom met ons harte loof en prys! Soveel slegte dinge gebeur iedere dag om ons – dinge wat ons skok tot in ons tone toe. De duiwel het homself so meester van die aarde gemaak dat ons moet veg met alles in ons teen hom.

Ek wil daarom by julle pleit, laat staan alles wat sleg is in jul lewens en keer nou terug na God ons Vader. Laat ons Hom loof met alles wat binne-in ons is en Sy weldade nie vergeet nie en net geluk, vrede- en blydskap sal in julle kom al die dae van jul lewens. Hierdie belofte het Jesus aan Sy dissipels gemaak dat as ons tot God bid en in Jesus se naam vra, ons sondes bely en nie meer sondig nie, God ons sal seën en groot vreugde aan ons verskaf in ons siele.

Wees daarom bly met my want ons God is baie groot. Ons hoef oor niks bekommerd te wees nie en alles in die grootste vertroue by Hom plaas. God is ’n God van weldade en Hy sal ons nooit verlaat as ons, ons harte aan Hom en Jesus gee nie!

Ek bid julle ’n Geseënde Nuwejaar 2017 toe en dat God julle baie, baie sal seën met sy goeie gawes iedere dag van jul lewens.

Mag alles wat ons doen of sê Tot glorie strek vir ons God en Heer En mag geen sonde nog hoe groot ’n Kloof tussen Vader en ons bring.

Here, ek bring almal wat op ons Lappieskombers van Rainbow Gospel Radio is asook almal wat dit sal lees, voor U Troon en bid gesondheid, liefde- en geluk oor hulle almal vir 2017. Seën in die besonder vir Nico, Corne en Jacques Franc in die dierbare naam van ons Here Jesus, Amen.

#inspirasie