‘N BELOFTE IS ‘N BELOFTE

TEKSVERS:

2 Sam 9:7

Dawid sê vir hom: “Moenie bang wees nie. Ek sal vir jou net goed wees omdat en jou pa, Jonatan, sulke goeie vriende was. Ek gaan al jou oupa Saul se grond vir jou teruggee, en jy kan altyd by my kom eet.”

Dawid was ‘n man van sy woord, hy het gehou by sy belofte. Daar was niemand wat hom kon ‘opcheck’ nie, Jonatan was reeds dood. God het ook baie beloftes vir ons gegee in Sy Woord, en hou daarby.

Jy voel dalk jy wil dit sommer uit skree: ‘beloftes, beloftes, beloftes’. Want dit voel asof niemand meer hul beloftes hou nie.

Baie jongmense soos jy, is al teleurgestel omdat mense nie by hul beloftes hou nie. Ongelukkig kan dit selfs iemand wees wat bekend is as ‘n kind van God, wat nie hul beloftes nakom nie. Dit maak seer. Jou ervaring is miskien dat die mense die naaste aan jou, nie doen wat hul sê nie. Jou pa, ma of jou beste vriend. Jy kan dan voel dat jy niemand meer wil vertrou nie. Maar almal is nie so nie. Dit moet jy weet. Daarom moet jy ook nie almal daarvolgens oordeel nie. Jy kan dalk uitmis op iets wat God jou wil leer of wil gee as ‘n geskenk uit Sy hand.

Ons het mekaar nodig. Jy is nie gemaak om alleen te loop deur die lewe nie. Weet dat jy op God kan vertrou. Hy sal jou nooit in die steek laat nie. Wanneer jy nie self meer kan loop of kan vashou nie, sal Hy jou vashou en jou dra.

Dit beteken ook dat jy iemand moet wees waarop mense kan staatmaak. Dink mooi voor jy aan iemand ‘n belofte maak, maak seker jy kan dit nakom. Dis beter om soms “Nee” te sê as om iemand te ‘drop’. Kies vandag om betroubaar te wees. Wees jy ‘n voorbeeld vir ander en laat Jesus se lig deur jou skyn. Nie net wat jy sê nie, maar ook in dit wat jy doen.

#gerdajansen