BROSE HOUERS VAN KOSBARE SKATTE

. Ons wat hierdie skat in ons het, is maar kleipotte wat maklik breek;

die krag wat alles oortref, kom dus van God, nie van ons nie.” 2 KOR. 4:7 .

Oosterse konings van die ou tyd het die gebruik gehad om hulle skatte in kleipotte te bewaar. Soos ‘n onaansienlike bliklamp ‘n helder lig kan verskaf en ‘n verwaarloosde boek edele gedagtes kan bevat, het die eenvoudige kleipot die draer van kosbare skatte geword. . So is dit ook in die koninkryk van God: eenvoudige vissers word dissipels, draers van God se skatte. Paulus vergelyk ons lewes met kleipotte waarin ons die skat van die heerlike boodskap van God se evangelie dra. Hoe groot die voorreg ook al mag wees, bly ons brose, sondige mense.Die lewe omring ons met struikelblokke en ons is kwesbaar en breekbaar, maar Christus omring ons met sy heerlikheid. . Die kleipot is ‘n beeld van menslike broosheid en verganklikheid, van uiterste feilbaarheid en besoedeling en onreinheid. Maar dit is ook beeld van die herskeppingsalmag van die Pottebakker wat ons lewes met sy kunstenaarshande hervorm tot sy eer. . Wanneer Hy ons roep tot dissipelskap, deins ons terug omdat ons diep bewus is van ons onvolmaaktheid en onbekwaamheid. Maar die Koning is vrymagtig en maak met sy kleipotte net wat Hy wil. God roep nie soseer die bekwames nie, maar God bekwaam die wat Hy roep. Ons mag nooit die gevoel van verwondering verloor oor juis ons - sondige mense – draers van sy skatte mag wees nie. Ons mag nooit die aandag van die skatte af op onsself fokus nie. Die glorie van jou lewe moet altyd God sin wees. Jy moet leef om sy getuie te wees en sy heerlikheid te laat gedy.

#inspirasie