Godsdiens en verhouding is nie dieselfde nie

Teksvers:

Amos 4:5

“Kom bring maar verkeerde offers wat suurdeeg in het.

Spog maar oor die offers wat julle uit julle eie vir die Here bring.

Julle Israeliete is mos lief daarvoor om so met julle godsdiens te spog” sê die Here.

Wees versigtig vir vals godsdiens, baie mense loop in gevaar omdat hul sê hul is Christene. Jy sou dalk al gehoor het dat mense sê ons bly in ‘n Christelike land. Maar daar is ‘n misleiding aan die gang. Daar is ‘n groot verskil tussen godsdiens en verhouding. Om nou en dan kerk toe te gaan, partykeer te bid en bybel te lees, is nie al wat God van jou vra nie. God vra ‘n verhouding met jou.

Ons kan só besig raak met die dinge van die Here dat ons nie by die Here van die dinge uitkom nie. God moet ons alles wees. Elke asem wat ons gee, elke beweging wat jy maak en elke woord wat jy sê. ‘n Lewendige verhouding met Hom. Hy moet jou rede wees vir opstaan in die oggend. Die eerste ding wat jy doen as jy jou oë oopmaak is tyd saam met Hom.

Tyd is vandag vir almal ‘n ‘issue’. “Ek het nie tyd om te bid of bybel te lees nie.” Staan dan vroëer op. As jy te moeg is om te bid voor jy gaan slaap, gaan dan vroëer bed toe. Begin om vir jouself ‘n beplanning saam te stel vir die dag. Kyk wat is die dinge wat vir jou prioriteit is en los dit wat jy nie nodig het om te doen nie. Minder tyd op sosiale media en speletjies speel op jou foon, tablet en laptop.

As jy ‘n kind van God is, dan is dit wat vir Hom belangrik is, ook vir jou belangrik. Dis maklik om die regte geluide te maak waarvan almal hou, maar het jy ‘n lewende verhouding met God? God ken jou, Hy sien als wat jy sê en doen. Vat dit wat jy uit Sy woord leer en maak dit deel van jou lewe.

#inspirasie #gerdajansen