Kom uit jou ‘comfort zone’

Teksvers:

Gen 12: 1,4

Op ‘n dag het die Here vir Abram gesê: “Jy moet weggaan, weg van die plek waar jy gebore is, weg van jou pa se huis af.

Ek sal jou ‘n ander land gee waar jy kan gaan bly.”

Abram het toe alles gelos en weggegaan,

net soos die Here vir hom gesê het.

Nie almal hou van verandering nie. Miskien verkies jy die bekende. Jou kamer, jul huis en tuin, jou skool en jou vriende. Dis jou ‘comfort zone’. ‘n Plek waar jy voel jy net jouself kan wees. Jy voel veilig. Dis soos ‘n voëltjie in ‘n nessie. Dan kom daar ‘n dag wanneer alles verander. Jul moet trek, nuwe huis, nuwe dorp. Jy sien net glad nie daarvoor kans nie. Die minste is nuwe vriende maak.

Party mense is mal oor nuwe dinge, nuwe uitdagings. God mag jou dalk in ‘n situasie plaas wat uit jou ‘comfort zone’ is. Dalk nie so drasties soos na ‘n nuwe dorp toe trek nie. Sal jy God vertrou in hierdie situasie. Hy weet wat Hy doen. Hou op bang wees om te waag. Dit kan ‘n nuwe stokperdjie of sport wees. Jy het dalk baie talent en God wil jou in daardie span gebruik.

Miskien vra iemand jou om deel te word van die koor. Jy is bang om voor ander mense te sing. Vra God om jou help om besluite te neem. Jy het ‘n talent van God ontvang. Gebruik dit. Jy kan mense se harte aanraak en selfs hul lewens verander. Jy kan deel word van die rugbyspan, jy is bang jy kry seer. Jy neem die besluit, en jy stel voor die span bid voor elke ‘game’. Jul wen die kampioenskap en almal wil weet hoe jul dit reggekry het? ‘n Kans om te getuig van God. Moenie geleenthede laat verby glip nie.

Waag die kans en sien hoe God jou gebruik. Word ‘n instrument in Sy hand.

#gerdajansen #inspirasie