Wees nederig
- Gerda Jansen
- Apr 10, 2017
- 2 min read
Teksvers:
Ef 3:8
Hoewel ek die geringste van al die gelowiges is, het Hy aan my
hierdie voorreg gegee om aan die heidennasies die evangelie van die onpeilbare
rykdom van Christus te verkondig.
Ons kan by Paulus leer wat dit beteken om nederig te wees, hy ag homself gering al
was hy die grootste apostel wat ooit geleef het. Hy het geweet dat hy uit genade
gered en gekies was om die evangelie te verkondig. Hy het ook nederig opgetree en
geweet dat sy gawes en talente ‘n geskenk van God is.
Dis maklik om so bietjie van ‘n grootkop te kry as jy as kaptein van die eerste span
gekies word. Wanneer jy as leerlingraad gekies word. Ons kan gou vergeet dat ons
leierseienskappe en talent om die sport te kan speel van God af kom. Ewe skielik
kyk ons neer op ander kinders. Jy word meer belangrik, en moet voor staan, eerste
‘n beurt kry.
Wie is jy wanneer jy in die spieël kyk? Hoe sien God en ander mense jou? Is dit ‘n
siel wat van die hoogte af kyk of iemand wat homself nie in die oë kan kyk nie, want
hy sien homself as te min werd. Net so gevaarlik soos wat dit is om hoogmoedig te
wees, is dit om te voel jy is nie goed genoeg nie. Om nederig te wees, beteken nie
dat jy deur almal op getrap kan word nie. Jy moet weet wat jy werd is en in
dankbaarheid teenoor God leef.
Nederigheid is ‘n besef in jou hart, jy is nooit te min nie, nooit te veel nie, altyd
genoeg. Wanneer jy jouself deur God se oë sien, kan jy in nederigheid voor Hom en
ander leef. Ons roem nie op alles wat ons goed en reg kan doen nie. Ons vergelyk
onsself nie met ander nie. God is vir my so belangrik dat ek alles doen vir Hom en
aan Hom die eer gee vir alles wat ek kan doen en wie ek is. In liefde vir Jesus wil ek
nederig wees soos Hy. My perfekte voorbeeld.
ความคิดเห็น