Eerste instink sê: “Bly weg!”
- Gerda Jansen
- May 29, 2017
- 2 min read
Teksvers:
Rig 14:3
Maar sy ouers vra hom: “Is daar nie onder jou familie of onder al jou volksgenote ‘n vrou nie dat jy na die heidene, die Filistyne, toe moet gaan om te trou?” Simson het vir sy pa gesê: “Kry haar vir my, want ek hou van haar.”
Simson wou ‘n Filistynse meisie hê, hul was beskou as ‘n nasie wat nie God dien nie. Sy ouers het hom gewaarsku, maar hy het nie geluister nie. God het ‘n wel ‘n plan hiermee gehad. Maar die kern is dat ons nie in ‘n verhouding moet ingaan met iemand wat nie God dien nie.
Daar is een meisie/ou by die skool van wie almal hou, sy/hy word heeltyd oor gepraat. Dis nie altyd goeie dinge nie, maar vir jou vriende groep is dit ‘okay’ want hy is ‘handsome’, sy is ‘sexy’. Jy voel aangetrokke tot hierdie persoon. Jy probeer meer uitvind van hom/haar. Sy kan seker nie so sleg wees as almal van haar hou nie. Sy het die mooiste glimlag en haar lyf gee jou drome wat jy nie hardop oor sal praat nie.
Die ‘hunk’ wat al die ‘games’ vir die Eerste span wen, is soos ‘n ‘hero’. Nie net is hy vinnig nie, maar hy kyk vir jou op ‘n manier wat jou lyf wil laat wegsmelt. Iewers is daar ‘n stemmetjie wat sê: “Bly weg.” Maar nou wil jy juis nader aan hierdie persoon beweeg. Jy hou van die gevaarlike kant van die lewe. Al wat ek kan sê is daardie stemmetjie wat jy hoor kan die Heilige Gees wees, en jy mag dit nie ignoreer nie.
Daar is rede waarom jy moet wegbly, gewoonlik wanneer jy te diep ingetrek word in ‘n verkeerde verhouding, kan jy baie seer kry. God is lief vir jou, gee om vir jou en wil jou beskerm teen seerkry. Jou pa waarsku jou teen sulke ouens of meisies want hy is ook lief vir jou en wil jou ook beskerm. Hy praat dikwels uit ervaring. Hy ken die einde.
Jy voel dalk dis onregverdig en dit maak nie sin nie, hulle wil dalk net nie hê jy moet gelukkig wees nie. Eintlik wil hul net nie hê jy moet jou vingers verbrand nie. Mens kan so verlief raak dat jy blind is om die gevaartekens te sien, en jy kan in ‘n situasie beland waaroor jy later baie spyt kan wees.
Comments