Vat die kans

Efes 5:16,17 –

Maak die beste gebruik van elke geleentheid, want ons lewe in ‘n goddelose tyd. Moet daarom nie onverstandig optree nie, maar probeer te wete kom wat die Here wil dat julle moet doen. Ek en jy is soms bang om kanse te vat omdat ons nie weet wat aan die einde gaan gebeur nie. Maar ek dink ons moet versigtig wees dat ons vrees vir mislukking of verwerping nie in die pad staan van dit wat God in ons lewe wil doen nie. Want om dit te doen kan ons uitmis op iets regtig spesiaal. Ons bid vir geleenthede, of dat die Here vir ons deure moet oopmaak en dan wanneer dit gebeur, dan is ons so verbaas of onseker dat ons dan nie besef dat dit van God af kom nie. Dis belangrik om seker te wees oor God se hart en dit waarmee Hy besig is, en al hoe ons daarby kan uitkom of helderheid daaroor het is wanneer ons so naby in verhouding met Hom staan. Ek voel altyd dat ek wil deel wees van dit waarmee God besig is, en ek daarby wil inpas. Ons moet onthou dat dit altyd oor Hom gaan en nie ons nie. Dat Sy Naam verheerlik word en Hy die eer kry. Dit is hoekom ons hier op aarde is. Wat staan vandag in die pad van jou drome? God is lief vir jou en wil so intens by jou lewe betrokke wees dat Hy jou grootste hartsbegeertes wil laat waar word. Jy het so baie in jou ingebou, gebruik dit tot Sy eer. Vat daai sprong al voel die ander kant te ver of onduidelik..weet dat Hy saam met jou spring en jou hand vashou.

#gerdajansen #inspirasie