Kla jy of doen jy?

Klaag 3:39 –

Wat kla ‘n mens oor sy lewe? Hy moet liewer sy sonde oorwin. Jy hoef nie ver te soek vir ‘n klomp klakouse nie. Mens kry hul oral. Daar is geen fokus op die goeie en mooi van die lewe nie. Moenie jou omring met hierdie tipe mense nie. Kies vriende wat opbou, wat positief is en wees jy dan ook iemand waar vriende hul tyd by wil spandeer. Anders kan mense later eerder draaie om jou wil loop want hul weet as hulle met jou praat, gaan jy net kla. Doen iets oor jou omstandighede. Vra jouself af, is dit regtig so erg? Wat kan ek doen om dit beter te maak? Die volk Israel was gestraf deur God as gevolg van hul sonde. Daar was ‘n rede waarom dit met hul sleg gegaan het. Maar weet, dat dinge nie vir altyd ooit sleg bly nie. Daar kom altyd weer goeie tye. Dit kan maklik voel asof die een na die ander slegte ding met jou gebeur. Maar dit gaan oor hoe jy dit hanteer. Prys Sy Naam in alle omstandighede. Dit is ‘n keuse. Daar is altyd baie meer dinge om oor dankbaar te wees as om oor te kla. Sien jy die glas half vol of half leeg? Slegte goed kan ook met jou gebeur as gevolg van dit wat jy self verkeerd gedoen het, moenie dan ander mense daarvoor blameer nie. Verander jou denkwyse. Soms moet jy iemand vergewe, eerder as om oor hulle te kla. As jy nie self kan nie, vra God vir hulp. Vra Hom om vir jou die ligte rand om hierdie donker wolk te wys. Hy kan die slegte ding wat jou so onderkry wegvat en vervang met vreugde. Spandeer dan jy eerder die tyd op jou kniee as in ‘n groepie wat saam kla oor alles in die lewe.

#gerdajansen #inspirasie