Sing en dans vir Hom

Eks 15:20 –

Mirjam die profetes, suster van Aäron, het die tamboeryn gevat en al die vroue het met tamboeryne agternageloop en gedans.

Mirjam het vir hulle voorgesing. Ons dien ‘n wonderlike God en ons het so baie om voor dankbaar te wees. As ek dink hoe God ons elkeen liefhet en dit wat Hy elke dag vir ons doen, dan wil ek uitbars in lag, dans en wil ek sing vir Hom. My vreugde is by Hom, dit maak my sterk. Almal kla, maar ek en jy is mos anders as die meeste van ‘n groep, want ons is God se kinders. Hoe die wêreld gaan sien dat ons anders is, is deur anders op te tree as die meeste mense om ons. Al gaan dinge rof en baie erg verkeerd, kies ons om te sing en te dans voor God. Al wil jy dit nie fisies doen nie, kan jy dit in jou hart voor God doen,dit sien in jou gedagtes en net met jou gedagtes en denke Hom loof en prys. Maar daar is ook verseker ‘n tyd wat ons dit hardop moet doen, daar is iets wat dan ook gebeur in die geestelike wêreld. Ons vier ‘n fees, ‘n oorwinning en die vyand sal vlug. Ek hou daarvan om te dink dat ons saam met die engele God aanbid, maar ook saam met alles in die natuur, die wind wat waai deur die bome, die voëls wat sing, die sonbesies in die dag en die krieke in die nag maak ‘n klank om God te eer. Dit is waarvoor ons gemaak is, om aan Hom ons alles te bring. En hoe dan anders as om te sing en te dans. Met of sonder instrumente net soos Mirjam. Die volk was dankbaar en bly dat God hul van die Egiptenare gered het. Kom ons doen dieselfde.

#gerdajansen #inspirasie